Excel என்பது மாணவர்கள் முதல் அலுவலக பணியாளர்கள் வரை, ப்ராஜெக்ட் செய்பவர்கள் முதல் ஆய்வுக்கட்டுரை எழுதுபவர்கள் வரை பலருக்கும் ஒரு அத்தியாவசியமான கருவியாகும். இருப்பினும், Excel பயன்படுத்தும் 70 சதவீதத்திற்கும் அதிகமானோர் அதன் அடிப்படை வசதிகளை மட்டுமே தெரிந்து வைத்துள்ளனர். பலருக்கும் அதன் சிக்கலான ஃபார்முலாக்கள் சிம்ம சொப்பனமாகவே இருந்து வருகின்றன. ஆனால், தற்போதுள்ள AI தொழில்நுட்பம், அடிப்படை அறிவு உள்ளவர்களை கூட Excel நிபுணர்களாக மாற்றும் வசதியை ஏற்படுத்தி கொடுத்துள்ளது.
முன்பெல்லாம் கடினமான ஃபார்முலாக்களை மனப்பாடம் செய்ய வேண்டியிருந்தது. ஆனால் இன்று AI ஒரு புத்திசாலித்தனமான உதவியாளராக மாறிவிட்டது. Excelல் உள்ள ‘Analyze Data’ என்ற AI அம்சம், நமது தரவுகளை ஆய்வு செய்து தானாகவே Charts மற்றும் Pivot Tables உருவாக்கி தரும். “இந்த டேட்டாவில் அதிக விற்பனை எந்த மாதம் நடந்திருக்கிறது?” என்று நீங்கள் ஒரு கேள்வி கேட்டால் போதும், அதுவே தரவுகளை அலசி ஒரு சார்ட் வடிவில் பதிலை வழங்கிவிடும்.
அடுத்ததாக, ஒரு காகிதத்தில் டேபிள் வடிவில் தகவல்கள் இருந்தால், அதை ஒவ்வொன்றாக டைப் செய்ய வேண்டிய அவசியமே இல்லை. உங்கள் மொபைல் போன் மூலம் அந்த தரவுகளை புகைப்படம் எடுத்து எக்செலில் அப்லோடு செய்தால், AI அதிலுள்ள எண்கள் மற்றும் எழுத்துக்களை கண்டறிந்து கட்டங்களுக்குள் தானாகவே நிரப்பிவிடும். “டைப்பிங் வேலை இனி கிடையாது, போட்டோ எடுத்தா போதும்!” என்ற நிலையை AI உருவாக்கியுள்ளது.
ஃபார்முலாக்களை பொறுத்தவரை, “பெயர் மற்றும் ஊர் ஆகிய இரண்டையும் ஒன்று சேர்” என்று நீங்கள் சாதாரணமாக டைப் செய்தால், AI அதற்குரிய சரியான ஃபார்முலாவை தேர்வு செய்து உங்களுக்கு வேலையை முடித்து தந்துவிடும். உங்களது நோக்கம் என்ன என்பதை மட்டும் AI-க்கு தெளிவாக புரிய வைத்துவிட்டால், ஆயிரக்கணக்கான கட்டங்களை ஒரு நொடியில் நிரப்பும் ‘Flash Fill’ போன்ற அற்புதங்களை அது நிகழ்த்தும். இது நேரத்தை மிச்சப்படுத்துவதோடு, மனித தவறுகளையும் குறைக்கிறது.
அதுமட்டுமின்றி, தற்போது ChatGPT போன்ற AI கருவிகளை ‘Add-ins’ மூலம் Excel உடன் இணைத்து பயன்படுத்த முடியும். இதன் மூலம் சிக்கலான VBA மேக்ரோ கோடிங்குகளை மிக எளிதாக எழுதலாம் மற்றும் மிகப்பெரிய தரவுகளை தரம் பிரிக்கலாம் . சுருக்கமாக சொன்னால், AI வருகைக்கு பிறகு Excel என்பது ஒரு வெறும் டேட்டா என்ட்ரி கருவி மட்டுமல்ல, அது ஒரு அதிவேக தரவு பகுப்பாய்வு கருவியாக உருவெடுத்துள்ளது.