AI தொழில்நுட்பம் இன்று உலகத்தையே ஆக்கிரமித்து வரும் நிலையில், கற்பனை உலகமான சினிமா துறையை மட்டும் அது விட்டுவைக்குமா என்ன? குறிப்பாக, ஹாலிவுட் திரையுலகில் AI தொழில்நுட்பம் என்பது தற்போது ஒரு ஹீரோ அல்லது ஹீரோயினை விடவும் மிக முக்கியமான அங்கமாக உருவெடுத்துள்ளது. AI தொழில்நுட்பம் என்பது சினிமாவையே அழித்துவிடும் என்ற ஒரு பொதுவான அச்சம் உலகெங்கும் நிலவினாலும், யதார்த்தத்தில் திரைப்படத் தயாரிப்பில் AI இல்லாமல் இனி ஒரு அடியும் எடுத்து வைக்க முடியாது என்ற நிலையே உருவாகியுள்ளது.
திரைக்கதை எழுத்தாளரும் இயக்குநருமான பெர்னி சூ, கடந்த 2025-ஆம் ஆண்டு Whispers என்ற AI தொழில்நுட்பம் சார்ந்த புதிய வகை ‘இன்டராக்டிவ்’ த்ரில்லர் படத்தை உருவாக்கி ஒரு சாதனையை நிகழ்த்தினார். இந்த படத்தின் சிறப்பம்சமே அதன் புதுமையான திரைக்கதை வடிவம் தான். இதில் பார்வையாளர்கள் திரைக்கு வெளியே அமர்ந்து படம் பார்ப்பவர்கள் மட்டுமல்ல; மாறாக, அவர்கள் கதையின் ஒரு அங்கமாகவே மாறி, குற்றவாளிகளை பிடிக்கத் துப்பறியும் அதிகாரிகளுக்கு உதவ முடியும்.
இந்த தொழில்நுட்பத்தின் மூலம் சினிமா பார்க்கும் அனுபவமே தலைகீழாக மாறப்போகிறது. ஒரு காட்சியில் வரும் கதாபாத்திரம் எடுக்கும் முடிவை பார்வையாளர்கள் மாற்றியமைக்கலாம்; அவர்கள் எடுக்கும் முடிவிற்கு ஏற்ப படத்தின் காட்சியும், கதையின் போக்கும் அடுத்த நொடியே மாறும். இயக்குநர் ஒரு படத்தை எடுத்து முடித்துவிட்டு, அதை அப்படியே பார்வையாளர்கள் மீது திணிக்கும் காலம் மறைந்து, பார்வையாளர்களும் ஒரு படத்தின் உருவாக்கத்தில் பங்குபெறும் புதிய புரட்சி வடிவமாக இது கருதப்படுகிறது.
திரைப்பட தயாரிப்பு என்பது அடிப்படையில் ‘கதை சொல்லும் கலை’ மற்றும் ‘தொழில்நுட்பம்’ ஆகிய இரண்டும் சந்திக்கும் புள்ளியாகும். இந்த நிலையில், AI தொழில்நுட்பம் என்பது அனுபவம் வாய்ந்த இயக்குநர்களுக்கும், புதிதாக வரும் தயாரிப்பாளர்களுக்கும் இதுவரை கண்டிராத பல புதிய கதவுகளை திறந்துவிட்டுள்ளது. கற்பனையில் கூட எட்ட முடியாத பிரம்மாண்டமான காட்சிகளையும், விர்ச்சுவல் உலகங்களையும் AI மூலம் மிக எளிதாக உருவாக்கிவிட முடியும் என்பது சினிமா உலகிற்கு ஒரு வரப்பிரசாதமாகும்.
வழக்கமாக ஒரு பிரம்மாண்டமான படத்தை எடுக்க தேவைப்படும் செலவில் பாதியிலேயே, AI தொழில்நுட்பத்தின் உதவியுடன் மிக உயர்தரமான காட்சிகளை உருவாக்க முடியும் என்பது நிரூபிக்கப்பட்டுள்ளது. ரசிகர்கள் தங்களுக்கு பிடித்த கதாபாத்திரங்களின் குணாதிசயங்களை அல்லது கதையின் முடிவுகளை தங்கள் ரசனைக்கேற்ப மாற்றியமைக்க வழிவகை செய்வது, சினிமாவை ஒரு தனிநபர் அனுபவமாக மாற்றுகிறது. இதனால் குறைந்த பட்ஜெட் படங்களை கூட உலகத் தரத்தில் பிரம்மாண்டமாக படைக்க முடியும் என்ற நம்பிக்கை தயாரிப்பாளர்களிடையே ஏற்பட்டுள்ளது.
சினிமா என்பது காலத்திற்கு ஏற்ப தன்னை தகவமைத்துக் கொள்ளும் ஒரு கலை வடிவம். ஆரம்பத்தில் ஊமை படங்களாக தொடங்கி, பிறகு பேசும் படங்களாகவும், அதன்பின் சினிமாஸ்கோப், டால்பி அட்மாஸ் என பல பரிணாமங்களை சந்தித்திருக்கிறது. அந்த வரிசையில், அடுத்த தலைமுறைக்கான சினிமா என்பது AI தொழில்நுட்பத்தை சார்ந்தே இருக்கும் என்பதில் ஐயமில்லை. ஒரு புதிய பரிணாம பயணம் தொடங்கிவிட்ட நிலையில், இனி திரையில் பார்ப்பது சினிமா மட்டுமல்ல, அது ஒரு புதுவிதமான டிஜிட்டல் அனுபவம்!