சமூக வலைதளங்களில் வயது கட்டுப்பாடு என்பது நீண்டகாலமாகவே இருந்து வருகிறது. 16 அல்லது 18 வயதுக்கு கீழ் உள்ளவர்கள் கணக்கு தொடங்குவதற்கு சில கட்டுப்பாடுகள் இருந்தாலும், பலர் தவறான வயது தகவல்களை அளித்து கணக்குகளை தொடங்கி வருகின்றனர். இது குறித்த புகார்கள் மற்றும் பல நாடுகளின் வலியுறுத்தலை தொடர்ந்து, முன்னணி சமூக வலைதளங்களில் ஒன்றான Discord தளம், AI மூலம் பயனர்களின் வயதை சரிபார்க்கும் புதிய முறையை அறிமுகப்படுத்தியுள்ளது.
AI மூலம் முக அமைப்பு ஆய்வு
சிறுவர்கள் இணையத்தில் தவறான உள்ளடக்கங்களை பார்ப்பதை தவிர்க்கவும், அவர்களின் பாதுகாப்பை உறுதி செய்யவும் பல்வேறு நாடுகள் கடுமையான சட்டங்களை கொண்டு வருகின்றன. இதனை முன்னிட்டு, Discord தனது பயனர்களுக்கு வயது சரிபார்ப்பை கட்டாயமாக்கியுள்ளது. இதன்படி, AI தொழில்நுட்பத்தை பயன்படுத்தி ஒருவரின் முக அமைப்பை வைத்தே அவரது வயதை கணிக்கும் முறை அமல்படுத்தப்பட உள்ளது. இது நவீன இணைய உலகில் ஒரு மிகப்பெரிய தொழில்நுட்ப மாற்றமாகக் கருதப்படுகிறது.
அடையாள அட்டை மற்றும் தரவுப் பாதுகாப்பு
முக சோதனை முறைக்கு அடுத்தபடியாக, அரசு அங்கீகரித்த அடையாள அட்டையை பதிவேற்றி வயதை உறுதி செய்யும் வசதியும் வழங்கப்பட உள்ளது. இத்தகைய தனிப்பட்ட தகவல்கள் தவறாக பயன்படுத்தப்படுமோ என்ற அச்சம் பயனர்களிடையே உள்ளது. ஆனால், பயனர்களின் முக அமைப்பு தரவுகளையோ அல்லது அடையாள அட்டையையோ தனது சர்வர்களில் சேமித்து வைக்க போவதில்லை என Discord நிறுவனம் திட்டவட்டமாக உறுதி அளித்துள்ளது.
முதிர்ந்த உள்ளடக்கங்களுக்கான கட்டுப்பாடு
வயதை முறையாக உறுதி செய்த பின்னர் மட்டுமே, பயனர்கள் சில குறிப்பிட்ட மற்றும் வயது வந்தவர்களுக்கான உள்ளடக்கங்களை காண முடியும். ஆரம்பத்தில் கேமிங் சமூகத்திற்காக தொடங்கப்பட்ட Discord, இன்று 200 மில்லியனுக்கும் அதிகமான பயனர்களை கொண்டுள்ளது. இதில் பல சர்வர்களில் முதிர்ந்தவர்களுக்கான தகவல்கள் பகிரப்படுவதால், சிறுவர்கள் அவற்றை அணுகாமல் இருக்க இந்த தொழில்நுட்ப ஏற்பாடு ஒரு பாதுகாப்பு அரணாக செயல்படும்.
சர்வதேச சட்டங்களும் முன்னெச்சரிக்கையும்
ஆஸ்திரேலியா உள்ளிட்ட சில நாடுகள் 16 வயதிற்கு உட்பட்டவர்கள் சமூக வலைதளங்களை பயன்படுத்த தடை விதித்துள்ளன. ஐரோப்பிய ஒன்றியம் மற்றும் இங்கிலாந்தும் சிறுவர்களுக்கான இணைய பாதுகாப்பை வலுப்படுத்த திட்டமிட்டு வருகின்றன. இத்தகைய கடுமையான சட்ட நடவடிக்கைகளில் இருந்து தப்பிக்கவும், தனது பயனர்களின் பாதுகாப்பை உறுதி செய்யவும் Discord இந்த முன்னெச்சரிக்கை நடவடிக்கையை எடுத்துள்ளது. “சிறுவர்களின் பாதுகாப்பே எங்களின் முதல் முன்னுரிமை” என அந்நிறுவனம் தெரிவித்துள்ளது.
சமூக வலைதளங்களுக்கு விடப்பட்ட சவால்
Discord எடுத்துள்ள இந்த முயற்சியை போலவே ஃபேஸ்புக், எக்ஸ் , இன்ஸ்டாகிராம் உள்ளிட்ட பிற சமூக வலைதளங்களும் விரைவில் இத்தகைய வயது சரிபார்ப்பு முறையை கொண்டு வரும் என எதிர்பார்க்கப்படுகிறது. முக அம்சங்களை வைத்து வயதை கணக்கிடும் இந்த முறை இணைய பாதுகாப்பில் ஒரு புதிய தரத்தை உருவாக்கும். மற்ற சமூக வலைதளங்களும் சமூக பாதுகாப்பை கருத்தில் கொண்டு Discordன் இந்த வழிமுறையை பின்பற்ற வேண்டும் என்ற கோரிக்கையும் எழுந்துள்ளது.