தொழில்நுட்ப வளர்ச்சி மனிதர்களின் வாழ்க்கையை எளிதாக்கினாலும், அதே தொழில்நுட்பத்தை பயன்படுத்தி அப்பாவி மக்களின் பணத்தை சுரண்டும் ஆன்லைன் மோசடிகளும் அதிகரித்து வருகின்றன. இந்தியா உள்ளிட்ட பல நாடுகளில் டிஜிட்டல் பரிவர்த்தனைகள் அசுர வேகத்தில் வளர்ந்து வரும் நிலையில், அதற்கு இணையாக மோசடி செய்பவர்களும் புதிய வழிகளை கையாள்கின்றனர். இத்தகைய சூழலில், வங்கி மற்றும் நிதித்துறையில் AI அல்காரிதம்கள் எவ்வாறு ஒரு பாதுகாப்பு கேடயமாக செயல்பட்டு, ஆன்லைன் மோசடிகளை முன்கூட்டியே கண்டறிந்து தடுக்கின்றன என்பதை புரிந்துகொள்வது அவசியமாகும்.
ஒவ்வொரு வாடிக்கையாளருக்கும் அவர் செலவு செய்யும் முறை மற்றும் பழக்கவழக்கங்கள் குறித்த ஒரு தனித்துவமான நடைமுறை இருக்கும். AI அல்காரிதம்கள் வாடிக்கையாளரின் கடந்த கால பரிவர்த்தனைகளை நுணுக்கமாக ஆய்வு செய்து, ஒரு குறிப்பிட்ட Pattern உருவாக்கி வைத்திருக்கும். உதாரணமாக, சென்னையில் வசிக்கும் ஒருவர் வழக்கமாக உள்நாட்டிலேயே செலவு செய்பவர் என்றால், திடீரென அவரது டெபிட் அல்லது கிரெடிட் கார்டு மூலம் வெளிநாட்டில் ஒரு பெரிய தொகைக்கு பண பரிவர்த்தனை நடந்தால், AI அதை உடனடியாக சந்தேகத்திற்குரியதாக வகைப்படுத்தி தடுத்துவிடும். ஒருவேளை நீங்கள் தான் அந்த பரிவர்த்தனையை உண்மையிலேயே செய்கிறீர்கள் என்றால், மீண்டும் உறுதிப்படுத்திய பிறகே அது அனுமதிக்கப்படும்.
தினமும் கோடிக்கணக்கான பண பரிவர்த்தனைகள் நடைபெறுவதால், மனிதர்களால் ஒவ்வொன்றையும் கண்காணிப்பது என்பது நடைமுறையில் சாத்தியமில்லாத ஒன்று. ஆனால், AI அல்காரிதம்கள் ஒவ்வொரு நொடியும் நடக்கும் லட்சக்கணக்கான பரிவர்த்தனைகளை ஒரு மில்லி செகண்ட் வேகத்தில் ஆய்வு செய்யும் திறன் கொண்டவை. பணம் ஒரு கணக்கிலிருந்து மற்றொரு கணக்கிற்கு சென்றடைவதற்கு முன்பே, அதில் ஏதேனும் முறைகேடுகள் அல்லது அசாதாரணமான மாற்றங்கள் உள்ளதா என்பதை சரிபார்த்து, ஏதேனும் தவறு இருந்தால் உடனடியாக அந்த பரிவர்த்தனையை தடுத்து நிறுத்துகிறது.
மோசடிக்காரர்கள் பெரும்பாலும் மற்றவர்களின் வங்கிக்கணக்கு லாகின் விவரங்களை திருடியே இத்தகைய குற்றங்களை செய்கின்றனர். பயனர் வழக்கமாக பயன்படுத்தும் IP முகவரி, பயன்படுத்தும் சாதனம் மற்றும் அவர்கள் லாகின் செய்யும் வேகம் ஆகியவற்றை AI ஏற்கனவே சேமித்து வைத்திருக்கும் தரவுகளுடன் ஒப்பிடும். அதற்கு முரண்பாடாக, புதிய ஒரு இடத்திலிருந்தோ அல்லது சாதனத்திலிருந்தோ லாகின் முயற்சி நடந்தால், AI உடனடியாக எச்சரிக்கை செய்து OTP செல்வதை தடுப்பதன் மூலம் கணக்கை பாதுகாக்கிறது. இதன் மூலம் திருட்டு முழுமையாக தவிர்க்கப்படுகிறது.
வாடிக்கையாளர்களுக்கு வங்கிகள் அனுப்புவது போலவே போலியான மின்னஞ்சல்கள் அல்லது குறுஞ்செய்திகளை அனுப்பி விவரங்களைத் திருடும் Phishing மோசடிகளையும் AI அல்காரிதம்கள் திறம்பட தடுக்கின்றன. சந்தேகத்திற்குரிய இணையதள லிங்க்குகள் அல்லது சொற்களை முன்கூட்டியே கண்டறிந்து, அவற்றை Spam என்று வகைப்படுத்தி வாடிக்கையாளர்களை எச்சரிக்கிறது. மேலும், பெரிய அளவிலான சட்டவிரோத பண பரிமாற்றங்கள், அதாவது பணம் பல்வேறு கணக்குகளுக்கு மாற்றப்பட்டு மீண்டும் ஒரே இடத்திற்கு வருவதை கண்காணித்து, அது Money Laundering என்பதை வங்கி அதிகாரிகளுக்கு முன்கூட்டியே தெரியப்படுத்துகிறது.
AI அல்காரிதம்கள் மிக துல்லியமாகச் செயல்படுவதால், உண்மையான வாடிக்கையாளர்களுக்கு எந்தவிதமான இடையூறும் இல்லாமல், மோசடிகளை மட்டுமே தனியாக பிரித்தெடுக்க முடிகிறது. இது சாதாரண பரிவர்த்தனைகள் தவறாக தடுக்கப்படுவதைக் குறைத்து, வங்கிச்சேவையின் நம்பகத்தன்மையை அதிகரிக்கிறது. எதிர்காலத்தில், மோசடி செய்பவர்கள் நுழைய முடியாத அளவிற்கு AI தொழில்நுட்பம் வாடிக்கையாளர்களின் பணத்தையும் வங்கி கணக்கையும் பாதுகாக்கும் ஒரு மிகச்சிறந்த அரணாக திகழும் என்று உறுதியாக நம்பப்படுகிறது.